पुण्यामध्ये एक धक्कादायक असा प्रकार समोर आलेला असून लग्नाला नकार दिल्याने एका तरुणीवर चाकूने वार करण्यात आल्याचा प्रकार खडकवासला परिसरात समोर आलेला आहे . मांडवी गावातील ही घटना असून उत्तम नगर पोलिसांनी या प्रकरणी एका व्यक्तीला अटक केली आहे.
उपलब्ध माहितीनुसार , सागर सचिन राऊत ( राहणार खडकवासला ) असे अटक करण्यात आलेल्या आरोपीचे नाव असून राऊतने केलेल्या हल्ल्यामध्ये ही तरुणी गंभीर जखमी झालेली आहे . तिच्यावर सध्या रुग्णालयात उपचार सुरू असल्याची माहिती आहे.
तक्रारदार तरुणीचे वय 21 वर्ष असून ती येरवडा भागातील रहिवासी आहे. आरोपी राऊत आणि तिची ओळख होती. राऊत याने तिच्याकडे लग्न संदर्भात विचारणा केली मात्र तिने नकार दिल्यानंतर आरोपी चिडलेला होता. फिरायला घेऊन जाण्याच्या बहाण्याने त्याने तिला खडकवासला येथील मांडवी गावात नेले आणि तिथे गेल्यानंतर वाद झाल्यावर चाकूने तिच्यावर वार केले. सागर राऊत याला अटक करण्यात आलेली असून पुढील तपास सहाय्यक पोलीस निरीक्षक चावरे करत असल्याची माहिती आहे.