महाराष्ट्रात एक खळबळजनक घटना उघडकीस आली असून विरार इथे मांडवी पोलीस ठाणे हद्दीतील उसगाव येथे रस्त्याकडेला एका 30 ते 35 वयोगटातील अज्ञात व्यक्तीचा हत्या केलेला मृतदेह चक्क पाण्याच्या ड्रममध्ये कोंबून फेकून देण्यात आलेला आढळून आला आहे. रस्त्यावरून प्रवास करणाऱ्या नागरिकांना दुर्गंधी आल्याने हा धक्कादायक प्रकार उघडकीस आला.
सजग नागरिकांनी तातडीने याबाबत पोलिसांना माहिती दिली. पोलिसांनी तात्काळ घटनास्थळी पोहचत तपासणी केली असता सदर मृतदेह कपड्याने गुंडाळलेल्या अवस्थेत ड्रममध्ये टाकून रस्त्याकडेला फेकून दिला होता. सदर व्यक्तीची गळा दाबून हत्या केल्याचा संशय व्यक्त होत असून पुरावा नष्ट करण्याचा हेतूने रात्रीच्या वेळी अंधारात रस्त्याकडेला फेकला होता.
पोलिसांनी मृतदेह ताब्यात घेत पुढील तपासासाठी पाठवून दिला आहे. सदर मृतदेहाची अद्याप ओळख पटली नसल्याने विरार पोलीस ठाण्यात अज्ञात व्यक्तीविरोधात हत्येचा गुन्हा दाखल केला असून अधिक तपास केला जात आहे.