शिक्षणाचे माहेरघर असलेल्या पुण्यात गुन्हेगारीचे प्रमाण वाढलेले पाहायला मिळत असून पिंपरी इथे मागील भांडणाच्या कारणावरून कुदळवाडी येथून एका तरुणाचे अपहरण करून खून केल्याचा प्रकार समोर आलेला आहे. गुरुवारी 28 तारखेला संध्याकाळी ही घटना घडलेली असून दोन जणांना ताब्यात घेण्यात आलेले आहे.
उपलब्ध माहितीनुसार , सिराज अहमद अबुल हसन खान ( वय 40 राहणार कुदळवाडी चिखली ) असे मयत व्यक्तीचे नाव असून सफेउद्दीन मोहम्मद शरीफ खान ( वय 40 वर्ष राहणार कुदळवाडी चिखली आणि अनिस ( राहणार मुंबई ) यांच्या विरोधात गुन्हा दाखल करण्यात आलेला आहे. दोन्ही आरोपींना पोलिसांनी अटक केलेली असून प्रकरणाचा तपास सुरू आहे.
तक्रारदार व्यक्ती असलेले निजाम अहमद अब्दुल हसन खान यांचा भाऊ सिराज याचे आरोपींसोबत काही दिवसांपूर्वी भांडण झालेले होते. त्या भांडणाच्या कारणावरून आरोपींनी सिराज खान यांचे अपहरण केले आणि त्यानंतर चऱ्होली येथील आरणेश्वर टेकडीच्या पायथ्याला निर्जनस्थळी घेऊन जात त्यांच्या डोक्यात आणि तोंडावर हातोडीने वार केले त्यात त्यांचा मृत्यू झाला. पोलिसांनी दोन आरोपींना ताब्यात घेतलेले असून तपास सुरू असल्याची माहिती आहे .